لە ئیدارەی ڕاپەرین كۆبوونەوەیەك بە مەبەستی جێبەجێكردنی بڕیارەكەی حكومەت لەبارەی چەكی بێمۆڵتەوە بەڕێوەچوو و چەند بڕیارێكی گرنگ دران.
بەپێی ڕاگەیەندراوێكی ئیدارەی ڕاپەرین كە وێنەیەكی دەست تۆڕی میدیایی ئێستا دراوە و تێیدا هاتووە، بە مەبەستی جێبەجێكردنی بڕیارەكەی حكومەت و بە ئامانجی سنوورداركردنی دیاردەی ناشارستانیی چەكی بێمۆڵەت ئەمڕۆ پێنجشەممە، سەرپەرشتیاری ئیدارەی ڕاپەرین سەرپەرشتیی كۆبوونەوەی لیژنەی باڵای ئەمنیی ڕاپەرینی كرد.
لە كۆبوونەوەكەدا، گرنگی جێبەجێكردنی ئەم بڕیارە بۆ پاراستنی ئاسایش و سەقامگیریی هاوڵاتییان و كەمكردنەوەی ڕووداوی نەخوازراو جەختیلەسەركرایەوە و لایەنە پەیوەندیدارەكان ڕاسپێردران میكانیزمێكی گونجاو بۆ بڕیارەكە جێبەجێبكرێن.
لەلایەكی دیكەوە لە ئیدارەی گەرمیان دەستبەسەر چەكی بێمۆڵەتدا گیراوە و سەرپەرشتیاری ئیدارەی گەرمیان لەگەڵ دەزگا ئەمنییەكان كۆبووەوە و چەند بڕیارێك دران.
هەر لە كۆبوونەوەكەدا ڕێكارەكانی جێبەجێكردنی بڕیارەكە بۆ دەستبەسەرداگرتنی چەكی بێمۆڵەت و مامەڵەكردن بە چەكەوە تاوتوێكران بڕیاردرا بە پێكهێنانی لیژنەیەكی باڵا بەسەرپەرشتی سەرپەرشتیاری ئیدارەی گەرمیان و ئەندامێتیی بەڕێوەبەرایەتیی ئاسایش و پۆلیس و پۆلیسی بەرگری و فریاكەوتن و هاتوچۆی گەرمیان و نوێنەری هێزەكانی پێشمەرگە لە سنوورەكە كە دەبێت سەرجەم ئەو دوكان و شوێنانەی چەكی بێمۆڵەت و مۆڵەتدار دەفرۆشن دابخرێن.
ئاماژە بەوەشكراوە، كە بڕیاردراوە بە دانانی مەفرەزەی هاوبەشی دەزگا ئەمنییەكان و لایەنە پەیوەندیدارەكان لە بازگەكانی سنووری ئیدارەی گەرمیان بۆ دەستبەسەرداگرتنی چەك بێمۆڵەت كە ڕێگە نادرێت بە هیچ كەسێك چەك هەڵبگرێت.
