وەزیری پلاندانانی عێراق رایگەیاند، پێویستە خێزانەکان لە ماڵەکانیان بمێننەوە لە رۆژانی سەرژمێریدا بەهۆی ئەوەی بۆ ئامانجی گەشەپێدانە، راوێژکارێکی سندوقی نەتەوەیەکگرتووەکان بۆ دانیشتوونیش لە وەزارەتەکە دەڵێت، زانیارییەکانی هاوڵاتییان پارێزراو دەبن.
محەمەد عەلی تەمیم، وەزیری پلاندانانی عێراق باسی لەوەکرد، ئەنجامدانی سەرژمێریی دانیشتووان و پێدانی زانیاری راست و درووست نوێنەرایەتی شایستەیەکیی نیشتمانیی گرنگ دەکات، لە کاتێکدا عێراق لە ساڵی 1987وە سەرژمێرییەکی گشتگیری تێدا ئەنجامنەدراوە.
ئاماژەی بەوەشدا، وەزارەتەکە هەموو ئامادەکارییەکانی خۆی کردووە بۆ ئەوەی لە کاتی دیاریکراوی خۆیدا سەرژمێری ئەنجامبدات لە 20 و 21ی مانگدا.
لای خۆشیەوە، راوێژکارێکی سندوقی نەتەوەیەکگرتووەکان بۆ دانیشتوونیش لە وەزارەتی پلاندانان رایگەیاندووە، زانیارییەکانی هاوڵاتییان پارێزراودەبن و تەنها بۆ بواری گەشەپێدان سوودی لێوەردەگیرێت و بۆ هیچ بوارێکی دیکە کاری پێناکرێت.
