کەنەدا یەکەم حاڵەتی گوماناویی ڤایرۆسی H5ی تۆمارکردووە، کە ئەنفلۆنزای باڵندەیە و لە تازەلاوێکدا دەرکەوتووە لە ناوچەی رۆژئاوا لە هەرێمی بریتیش کۆڵۆمبیا.
بەرپرسانی تەندروستیی هەرێمەکە باس لەوەدەکەن، پێدەچێت ئەو تازەلاوە ڤایرۆسەکەی لە باڵندەیەک یاخود لە ئاژەڵێکەوە بۆ گواسترابێتەوە و لە سەنتەری چاودێریی نەخۆشییەکانی منداڵان چاودێریی دۆخی تەندروستی دەکرێت.
ئاماژە بەوەشکراوە، بەدوای سەرچاوەی نەخۆشییەکەدا دەگەڕێن و وەزیری تەندروستیی وڵاتەکەش دەڵێت، هێشتا مەترسییەکان لەسەر هاوڵاتییان کەمە.
هۆکاری بڵاوبوونەوەی ئەنفلۆنزای باڵندەی H5 لە سەرانسەری جیهاندا دەگەڕێتەوە بۆ باڵندە کێوییەکان و دەبێتە هۆی بڵاوبوونەوەی ڤایرۆسەکە لە پەلەوەر و مانگا شیردەرەکانی ئەمریکا، چەندین حاڵەتی مرۆیی لەم دواییانەدا لە کرێکارانی کارگەکانی بەرهەمهێنانی شیرەمەنی و گێڵگە پەلەوەرییەکانی ئەمریکادا تۆمارکراوە.
