بەڕێوەبەرایەتیی كەشناسیی سلێمانی رایدەگەیەنێنت، “بارانبارین دەستپێدەكات و پلەكانی گەرما نزمدەبنەوە”.
بەپێی راگەیەندراوێكی بەڕێوەبەرایەتیی كەشناسیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، لە ئەمڕۆ پێنجشەممەوە تاوەكو رۆژی شەممە كاتەكانی نیوەڕۆ ئاسمانی هەرێم بەردەوام نیمچەهەور دەبێت و لە ئەنجامی هاتنی نزمە پاڵەپەستۆیەكی لاواز بارانبارین لەسەر هەندێك ناوچەی سنووری باشووری هەرێم بە تایبەت سنووری پارێزگای سلێمانی و بەشێك لە پارێزگای هەڵەبجە و ئیدارەی گەرمیان رێژەی بارانی پێشبینیكراو لە نێوان (1-3) ملم دەبێت.
هەر لە راگەیەندراوەكەدا هاتووە، ئێوارەی ڕۆژی شەممە لە ئەنجامی یەكگرتنی دوو نزمە پاڵەپەستۆ هەرێمی كوردستان دەكەوێتە ژێر كاریگەریی شەپۆڵێكی بارانبارین و زۆرترین رێژەی بارانبارینی پێشبینیكراو لە ماوەی ئەم شەپۆڵە دەكەوێتە رۆژی یەكشەممە و لەگەڵ بارانبارین هەورە تریشقە سەرجەم ناوچە جیاجیاكان دەگرێتەوە.
دەشڵێت، ” سەبارەت بە پلەكانی گەرما بە (2-5) پلە نزمدەبێتەوە و خێرایی با زیاددەكات سەرووی 35 كم لە كاتژمێرێكدا و رۆژی دووشەممە كاریگەریی ئەم شەپۆڵە لەسەر ناوچەكەمان دەمێنیتەوە رۆژی سێشەممە كۆتایی بە كاریگەری ئەم شەپۆڵە دێت”.
