بەهۆی بەرتیل وەرگرتنەوە بەرپرسی هۆبەی زەوی و زار لە فەرمانگەی باجی كەركوك، بە 10 ساڵ زیندانیكردن و پێبژاردن سزا درا.
دەستەی دەستپاكی عێراق لە راگەیەندراوێكدا بڵاویكردەوە، دادگای تاوانەكانی كەركوك بە شێوەی ئامادەنەبوو، سزای 10 ساڵ زیندانیكردنی بەسەر، هەنا عەبدولكەریم بەیاتی، بەرپرسی هۆبەی زەوی و زار لە فەرمانگەی باجی كەركوك سەپاند.
ئاماژەی بەوەشكردووە، لەگەڵ ئەو سزایەشدا پێبژاردنی دارایی بە گوێرەی بەندەكانی بڕیاری 160ی دووەم/1 ساڵی 1983، بە تۆمەتی ورگرتنی بەرتیل بۆ جێبەجێكرنی مامەڵەی هاووڵاتیان بە پێچەوانەی یاسا و رێنوێنییەكان سەپێندرا.
دەستەكە ئەوەشی ئاشكراكردووە، پیشتریش دادگا سزای زیندانیكردنی چوار ساڵی بەسەر ئەو بەرپرسەی كەركوك سەپاندووە ئەوەش بە تۆمەتی دەستكاری مامەڵەی هاووڵاتیان و سەرەنجام بەپێی هەردوو بڕیارەكە فەرمانی دەستگیركردن و دەستبەسەرداگرتنی موڵكەكانی هەنا عەبدولكەریم بەیاتی دەرچووە و گەشتكردنیشی لێقەدەغەكراوە و ئەو كەسانەشی زەرەرمەندبوون بەهۆی كارە نایاسایەكانییەوە دەتوانن سكاڵای یاسایی لەسەر تۆمار بكەن.
