بەڕێوەبەرایەتیی ئاسایشیی ئابووری لە شاری هەولێر دەستی بەسەر کۆمپانیایەکی ساختەکردنی پاتری ئۆتۆمبێلدا گرت.
بەڕێوەبەرایەتیی ئاسایشی هەولێر بڵاویکردەوە، دوای دەستکەوتنی زانیاریی لەسەر کۆمپانیای (Real king) بۆ فرۆشتنی پاتری ئۆتۆمبێل، دەرکەوت کە کۆمپانیای ناوبراو پاتری ئۆتۆمبێل لە وڵاتی ئێران و تورکیا هاوردە دەکات، دواتر پاترییەکان لەناو کۆگایەک لە نزیک شاری هەولێر بە ستیکەری کۆمپانیاکانی تر دەستکاری و ساختە دەکات و ژمارەی ئەمپێرەکانی سەر پاترییەکان زیاددەکات و پاترییەکان لە 25-30ئەمپێری کراوەتە 60 ئەمپێری و زیاتر لە بیست هەزار دانەی ئەم پاترییانە لەناو بازارەکانی هەرێمی کوردستان ساخکردووتەوە.
ئاشکراشیکرد، لە ئەنجامى پێشکەشکردنى زانیاری و بەڵگەکان بۆ دادوەرى لێکۆلینەوەى ئاسایش فەرمانى دەستگیرکردن و گرتنەبەرى رێکارە یاساییەکان دەرچوو و خاوەن کۆمپانیاکە بەناوی ( ک . و . ج) و کرێکارێکی بیانی بەناوی (ڤ . چ . چ) کە دەستیان لەم ساختەکاریەدا هەبوو دەستگیرکراون و پەڕاوى لێکۆڵینەوەیان بۆکراوەتەوە و دەستیش بەسەر 11 هەزار دانە پاتریدا گیراوە.
