دامەزراوەی ساڵ، دەنگۆی تەقەکردن لە ئاهەنگەکەی ئەمڕۆی سلێمانی ڕەتدەکاتەوە و دەڵێت، هەمان ئاهەنگ دووبارە ئەنجامدەدەینەوە.
دامەزراوەی ساڵ ڕوونکردنەوەیەکی لەبارەی دروستبوونی پشێوی لە ئاهەنگەکەی ئەمڕۆی پارکی هەواری شار [کە ئەو دامەزراوەیە ڕێکیخستبوو] بڵاوکردەوە و ئەمەی خوارەوە دەقەکەیەتی:
ئێمە لە دامەزراوەی ساڵ، خۆمان بە قەرزاری خەڵکی خۆشەویستی سلێمانی و میوان و ڕێبواران دەزانین بۆ ئەو بەشدارییە بەرفراوانەی ئەمڕۆیان لە ئاهەنگی جەژنانەی سلێمانیدا. لێرەوە ئاشکرای دەکەین بە پشتبەستن بە داتاکانی ئیدارەی شوێنەکە و وێنە و ڤیدیۆ تۆمارکراوەکان، ژمارەی بەشداربووان نزیکەی (10 هەزار کەس) بووە.
ئەم ئاهەنگە بەمەبەستی خۆشگوزەرانیی خەڵکی شارەکە و میوانان بە خۆڕایی ئەنجامدرا، بەڵام بەداخەوە لە بەشی یەکەمی ئاهەنگەکەدا، ژمارەیەک کەسی ئاژاوەگێڕ هەوڵی تێکدانی کەشوهەوای ئاهەنگەکەیان دا. لەبەرئەوە، بە بڕیاری خۆمان ئاهەنگەکەمان ڕاگرت. لێرەوە سەرجەم ئەو هەواڵانە بەدرۆدەخەینەوە کە باس لە ڕووداوی تەقەکردن دەکەن؛ ڕایدەگەیەنین کە هیچ ڕووداوێکی تەقەکردن ڕووینەداوە و هیچ کەسێک بریندار نەبووە.
ئەو دەنگۆیانەی لەلایەن هەندێک دەزگای ڕاگەیاندنەوە بڵاوکراونەتەوە، بەتەواوی ڕەتیاندەکەینەوە و بە هەوڵێکی ناڕەوای دەزانین بۆ شێواندنی ناوبانگی شاری سلێمانی.
بڕیارمانداوە لە کات و شوێنێکی گونجاوی تردا، هەمان ئاهەنگ دووبارە ئەنجامبدەینەوە.
