نوێترین زانیاری لەبارەی زانکۆلاین

وتەبێژی وەزارەتی خوێندنی باڵا رایگەیاند، تا ئێستا هیچ وادەیەک نییە بۆ راگەیاندنی ناوی ئەو خوێندکارانەی فۆڕمی زانکۆلاینیان پڕکردووەتەوە.

عەباس ئەکرەم وتەبێژی وەزارەتی خوێندنی باڵا و توێژینەوەی زانستی بە تۆڕی میدیایی ئێستای راگەیاند، لەلایەن لیژنەیەکی تایبەتەوە لە وەزارەت کارکردن بۆ وەرگرتنی خوێندکاران لە زانکۆ و پەیمانگا حکومییەکان بۆ ئەو خوێندکارانەی لە رێگای زانکۆلاینەوە فۆڕمیان پڕکردووەتەوە بەردەوامە.

وتیشی، ئەو دەنگۆیانەی باس لەوەدەکەن لە چەند رۆژی داهاتوودا ناوەکان دەردەچن، دوورن لە راستییەوە، چونکە تا ئێستا هیچ وادەیەک دیارینەکراوە، هەر هەواڵێک لەوبارەیەوە هەبێت خۆمان بە رەسمی رایدەگەیەنین.

لە 5 ی ئەم مانگەوە وەزارەتی خوێندنی باڵا دەرگای پڕکردنەوەی فۆڕمی زانکۆلاینی داخستووە و ماوەی دوو هەفتەشە خوێندکاران لە چاوەڕوانی گەڕاندنەوەی ناوەکانیاندان.

پێشتر د. ئارام محەمەد وەزیری خوێندنی باڵا بەڵێنیدابوو جێگای سەرجەم خوێندکاران لە خوێندنی بێبەرامبەر لە زانکۆ و پەیمانگە حکومییەکان بکرێتەوە.