لەگەڵ ئەوەی ئەمڕۆ لە سەرجەم دامودەزگاکانی هەرێم پشووە، دابەشکردنی مووچەی مانگی نۆ بەردەوامدەبێت.
بەپێی ئەو لیستی مووچەیەی وەزارەتی دارایی بڵاویکردووەتەوە، ئەمڕۆ مووچەی (دەستەی دەستپاکی، دەستەی وەبەرهێنان، دەستەی ژینگە، دەزگای مین، ناوچەکانی دەرەوەی هەرێم، کۆمسیۆنی باڵای هەڵبژاردنەکان، دیوانی چاودێریی دارایی، مافی مرۆڤ، کار و کاروباری کۆمەڵایەتی، کاروباری شەهیدان و ئەنفالکراوان، دارایی و ئابوری، تەندروستی) دابەشدەکرێت.
ئەوە لەکاتێکدایە درەنگانی شەوی رابردوو وەزارەتی دارایی بڵاویکردەوە، لەگەڵ ئەوەی رۆژی دووشەممە پشووی رەسمییە لە هەرێمی کوردستان، دابەشکردنی مووچە بەپێی خشتەی راگەیەندراو بەردەوامدەبێت و دەوامی سەرجەم ئەو بانکانە ئاسایی دەبێت کە ئەرکی دابەشکردنی مووچەیان لە ئەستۆدایە.
