هاوپەیمانیی چاودێرانی بێلایەن، رایدەگەیەنێت، “لە هەولێر و دهۆک بانگەشە بە منداڵ و کەسانی بیانی کراوە”.
سەلما فاتیح، وتەبێژی تۆڕی هاوپەیمانیی چاودێرانی بێلایەن، لە کۆنفرانسێکی رۆژنامەوانیدا لەبارەی پێشێلکارییەکانی هەڵبژاردنەوە رایگەیاند، لە هەر چوار پارێزگاکەی هەرێمی کوردستان هەڕەشە لە چاودێرانمان دەکرێت و مامەڵەی خراپیان لەگەڵدا دەکرێت.
باس لە ئەوەش دەکات، کێشەی پەنجەمۆر هەیە لە بەشێکی زۆری بنکەکانی دەنگدان و ئەوەش دەبێتەهۆی بێبەشبوونی هاوڵاتییان لە پرۆسەی دەنگدان.
بە وتەی وتەبێژی تۆڕی هاوپەیمانیی چاودێرانی بێلایەن، “کەسانی سەربازیی ناسراو بە جلوبەرگی مەدەنییەوە لە بنکەکانی دەنگدان لەبری کەسانی دیکە دەنگ دەدەن، هەروەها کوژاندنەوە و کارنەکردنی کامێراکانی چاودێری لە بنکەکانی دەنگداندا یەکێکی دیکەیە لە پێشێلکارییەکان”.
دەشڵێت، “لە چەند بنکەیەک بەتایبەت لە هەولێر و دهۆک، بەئاشکرا بانگەشە بە منداڵ دەکرێت، کە ئەوە جگە لە پێشێلکاریی پرۆسەی دەنگدان پێشێلکارییە بە مافەکانی منداڵان، هەروەها لە هەولێر، کارتی دەنگدان بە کەسانی بیانی دابەشکراوە”.
