میدیا ئیسرائیلییەکان، ئەمڕۆ شەممە بڵاویانکردەوە، کە لە رێگەی سێ درۆنەوە ماڵی بنیامین ناتانیاهۆ، سەرۆک وەزیرانی ئیسرائیل لە قیساریا بە ئامانجگیراوە.
بە گوێرەی ئەو زانیارییانەی میدیاکان باسیان لێوەکردوون، دوو لە درۆنەکان لە ئاسمان خراونەتە خوارەوە بەڵام دانەیەکیان نەتوانراوە بخرێتە خوارەوە و لە بەشێکی ماڵەکەی ناتانیاهۆی داوە.
باس لەوەشکراوە، هێرشەکە لە کاتێکدا روویداوە، سەرۆک وەزیران و هاوژینەکەی لەناو ماڵەکەدا نەبوون، هەر بۆیە هەردووکیان سەلامەتن.
هێزێکی زۆری ئەمنی بەرەو ناوچەکە گواستراونەتەوە، باس لەوەش دەکرێت، بە گوێرەی خەمڵاندنەکان هێرشەکان لە لوبنانەوە ئەنجامدراون.
