لەگەڵ نزیکبوونەوەی کردنەوەی ناوەندەکانی خوێندن، یەکێتیی مامۆستایانی کوردستان بەبۆنەی دەستپێکی ساڵی نوێی خوێندنەوە بەیاننامەیەکی بڵاوکردەوە و شەش داواکاری هەیە.
یەکێتیی مامۆستایانی کوردستان ئەمڕۆ دووشەممە راگەیەندراوێکی بڵاوکردەوە و تیایدا هاتووە، “پێویستە کێشەی مووچە بە یەکجاری بنبڕ بکرێت کە پێمان وایە بڕیاری دادگای فیدراڵی و ئەو لێکتێگەیشتنانەی لەم دواییانە کراوە هەنگاوی باشن بۆ چارەسەر”.
لە بەیاننامەکەشدا هاتووە:
یەکەم: دەبێت پڕۆسەی پەروەردە و خوێندن لە ریزبەندیی یەکەمی بایەخپێدانی حکومەت بێت، بە کردار.
دووەم: کێشەی مووچە بە یەکجاری بنەبڕ بکرێت کە پێمان وایە بڕیاری دادگای فیدڕاڵی و ئەو لێکتێگەیشتنانەن بەم دواییە لە نێوان هەردوولا کراون هەنگاوی باشن بۆ چارەسەر بە دیاریکراوی بە نیشتیمانی و هاوتاکردنی.
سێیەم: پێویستە بەرزکردنەوەی مووچە بڕیاری لێبدرێت، چونکە وەستاندنی وێڕای ئەوەی پێچەوانەی یاسای خزمەتی شارستانیی ژمارە 24ی ساڵی 1960 و یاسای مووچەی ژمارە 23ی ساڵی 2008 و هەموارکراوەکانییەتی، زەرەر و زیانی زۆری گەورەی ماددی لە مامۆستایان و فەرمانبەران داوە.
چوارەم: دەبێت هەموو هەوڵێک بدرێت بۆئەوەی مامۆستایان و فەرمانبەرانیش لە هەموو ئەو پێشینانەی لە بانکە حکومییەکان دەدرێت، لێیەوە سودمەند بن، هاوشێوەی هاوڕێ و هاوەڵەکانیان لە عێراق باشترین فاکتەریش بۆئەوە، چوونی مووچەکانە بۆسەر ئەو بانکانە.
پێنجەم: رێژەی ئەو مامۆستایانەی لە زەوی نیشتەجێبوون سوودمەند نەبوون، زیاترە لە 60%، بۆیە دەبێت هەنگاوی پێویست و بەپەلە بنرێت لەو بارەیەوە.
شەشەم: دەبێت کەسی شیاو لە شوێنی شیاو دابنرێت، لەسەرەوە تاوەکو خوارەوە، چونکە پڕۆسەی پەروەردە و خوێندنی باڵا وەکو هەر دامەزراوەیەکی دیکە نییە هەرچۆن بێت بەڕێوەبچێت.
