بەشی یاسایی پەرلەمانی کوردستان داوایی یاسایی لەسەر ڤیدیۆ کلیپێک تۆمار دەکات کە لەلایەن هەڵگورد قەهار، شاعیری ناسراوی دەڤەری بادینانەوە تۆمارکراوە.
تۆڕی میدیایی ئێستا پەیوەندیکرد بە خاوەنی ڤیدیۆ کلیپەکەوە و هەڵگورد قەهار ڕایگەیاند، “من تا ئێستا بە فەرمی ئاگادار نەکراومەتەوە لەسەر ئەو پرسە و لە ئایندەدا پارێزەرەکەم لەسەر ڕێکارە یاساییەکان قسە دەکات”.
هەڵگورد قەهار ڕاشیگەیاند، ئێستا ئەو ناتوانێت قسە لەسەر سکاڵاکەی پەرلەمان بکات و هێشتا زووە بۆ قسەکردن.
ڕاگەیاندنی پەرلەمان لەسەر سکاڵاکە ئاشکرایکردووە، “بەشی یاسایی دیوانی پەرلەمانی کوردستان، سکاڵای یاسایییان لەسەر هەلگورد قەهار و شیرین محمد تۆمارکرد، کە ماوەیەک لەمەوبەر لە پەیجی خۆیان ڤیدیۆییەکیان بڵاوکردبووەوە و تیایدا سوکایەتیان بەپەرلەمان کردبوو”.
ڕاگەیاندنی پەرلەمان وتوشیەتی، ” لێرەشەوە بەهەموولایەک رادەگەیەنین هەرسوکایەتییەک و بێڕێزیەک لە بەرامبەر پەرلەمان بکرێت، ڕێکارە یاساییەکان دەگرینەبەر و بێڕێزیکاران ڕوبەڕوی یاسایی دەکەینەوە، چونکە سوکایەتیکردن بە پەرلەمان، کە نوێنەری ڕاستەقینەی خەڵکی کوردستانە، پێمان وایە بێڕێزییە بەرامبەر هەموو خەڵکی کوردستان”.
لە ڤیدیۆ کلیپەکەدا هەڵگورد قەهار ڕەخنەی توندی لە ڕۆڵی پەرلەمان و ئەرکی ئەندامانی پەرلەمان گرتبوو کە “بەپارە کاردەکەن”.
