بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازیی لە ئەندرۆ بیزلی، كونسوڵی گشتیی بەریتانیا لە هەرێمی كوردستان كرد.
لە دیدارەكەدا گەشەپێدانی پەیوەندییەكان و فراوانكردنی هەماهەنگییەكانی نێوان هەردوولا لە چوارچێوەی پاراستنی بەرژەوەندییە باڵاكان جەختیلێكرایەوە.
لە درێژەی دیدارەكەدا دۆخی گشتیی هەرێمی كوردستان تاوتوێكرا و سەرۆك بافڵ جەلال تاڵەبانی سیاسەت و ستراتیژی یەكێتی بۆ كۆی پرسەكان خستەڕوو و ئاماژەی بەوەكرد، “ئێمە بەبیركردنەوەیەكی نیشتمانییانە و لەبەرچاوگرتنی پێداویستییەكانی دۆخەكە هەنگاودەنێین، ئامانجیشمان هێنانە كایەی حوكمڕانییەكی دادپەروەر و خزمەتگوزارە كە تێیدا هاوڵاتییان مافەكانیان پارێزراوبێت، ئەمەش خواستی هەموولایەكە و پێویستە كۆتایی بە جیاكاری لە پێشكەشكردنی خزمەتگوزاریی و تاكڕەوی لە بەڕێوەبردندا بهێنرێت”.
چارەسەركردنی كێشەكانی نێوان هەولێر و بەغداد و هەوڵەكان بۆ گەیشتن بە ئەنجامێكی ئەرێنی، تەوەرێكیتری دیدارەكە بوو و هەردوولا هاوڕابوون دەستوور و هاوبەشیی راستەقینە بنەمای چارەسەركردنی كێشەكان بن و مافی هەموولایەك پارێزراوبێت.
