سەرچاوەیەکی ئاگادار بە ئاژانسی رۆیتەرزی وتووە، “عێراق بەنیازە لە مانگی ئەیلولدا بەرهەمهێنانی نەوت بۆ نێوان 3.85 بۆ 3.9 ملیۆن بەرمیل لە رۆژێکدا کەمبکاتەوە، ئەمەش لە کاتێکدایە لە مانگی تەمموزدا بڕی بەرهەمی نەوتی عێراق لە نزیک 4.25 ملیۆن بەرمیل نەوت بووە.
ئاژانسەکە لە زاری سەرچاوەیەکی ئاگادارەوە ئاماژەی بەوەکردووە، ئەو هەنگاوەی عێراق لە چوارچێوەی ئەو پلانەیە کە لەگەڵ هاوپەیمانیی ئۆپێک پڵەس رێککەوتوون بۆ قەرەبووکردنەوەی بەرهەمی زیادە لە سەرووی پشکەکەیەوە کە لە مانگەکانی رابردوودا بەرهەمی هێناوە.
بە گوێرەی بڕیارەکانی ئۆپیک پڵەس، دەبوایە عێراق بڕی چوار ملیۆن بەرمیل نەوتی رۆژانە بەرهەمبهینێت، بەڵام پشکەکەی زیاتر بووە و بەڵێنی قەرەبووکردنەوەی داوە.
پێشتر ئۆپیک پڵەس رایگەیاند، بڕی زیادەی بەرهەمی عێراق لە نێوان مانگی کانوونی دووەم بۆ تەمموزدا گەیشتووەتە یەک ملیۆن و 400 هەزار بەرمیل لە رۆژێکدا.
دوێنێ چوارشەممە هەیسەم ئەلغایس سکرتێری گشتیی ئۆپێک سەردانی بەغدای کرد و لەگەڵ بەرپرسانی حکومەتی عێراق چەند کۆبوونەوەیەکی ئەنجامدا.
