سەرۆكی ڕوسیا ڕایدەگەیەنێت، مۆسكۆ بڕیاریداوە بە گۆڕینی پارەی داهاتی غازی هەناردەكراو بۆ ئەوروپا بە ڕۆبڵ لە خێراترین كاتدا، بڕیارەكە بووەهۆی بەرزبوونەوەی نرخی نەوت لە بازاڕەكانی جیهان و دابەزینی بەهای دۆلار.
ڤلادیمێر پوتین، سەرۆكی ڕوسیا ئەمڕۆ ڕێنماییشیدایە بانكی ناوەندی و ئەنجومەنی وەزیرانی وڵاتەكەی “بۆ دیاریكردنی ڕێوشوێنی مامەڵەكان لەگەڵ ئەوروپا بە ڕۆبڵی ڕوسی لەماوەی یەك هەفتەدا”.
پوتین وتی، “مانای نییە شمەكی ڕوسی ڕەوانەی یەكێتیی ئەوروپا و ویلایەتە یەكگرتووەكان بكرێت و لە بەرامبەریدا پارەكەی بە یۆرۆ و دۆلار بێت”، دووپاتیشیكردەوە، مۆسكۆ بڕیاری خۆی داوە لە بەكارنەهێنانی “دراوی وڵاتانی نادۆست” لە گواستنەوەی غازدا.
سووربوونی وڵاتەكەشی لەسەر فەراهەمكردنی پێداویستیی غاز بەپێی گرێبەستە واژووكراوەكان دووپاتكردەوە، سەرەڕای ئەوەی هەندێك لە وڵاتان “بڕیاری نایاساییان داوە” دەربارەی سڕكردنی سامانی ڕوسیا.
دوابەدوای بڕیارەكە بەهای دۆلار بۆ خوار 95 ڕۆبڵ دابەزی، ئەمەش یەكەمجارە لە 3ی ئەم مانگەوە.
هەروەك نرخی نەوت لە بازاڕەكاندا بەرزبووەوە و گەیشتە 120 دۆلار بۆ هەر بەرمیلێك.
