فراکسیۆنی یەکێتی لە ئەنجومەنی نوێنەرانی عێراق رایدەگەیەنێت، “هێرشەكەی ئەمڕۆی نزیك قەزای سەیدسادق بێڕێزییە بە سەروەریی خاك و ئاسمانی عێراق”.
فراکسیۆنی یەکێتی لە ئەنجومەنی نوێنەرانی عێراق لە راگەیەندراوێکدا بڵاویکردەوە، “ئێمە وەك فراكسیۆنی یەكێتیی نیشتمانیی كوردستان لە ئەنجومەنی نوێنەرانی عێراق هێرشە درۆنییەكەی ئەمڕۆی نزیك قەزای سەیدسادق، بەتوندی ئیدانەدەكەین، كە ئۆتۆمبێلی تیمێکی رۆژنامەوانیی كردەئامانج، بەهۆیەوە دوو رۆژنامەنووسی ژن گیانیان لەدەستدا و رۆژنامەنووسێکی تریش بەسەختی برینداربوو”.
لە راگەیەندراوەکەی فراکسیۆنی یەکێتیدا هاتووە، ئەم جۆرە هێرشە تاوانكارییانە پاساوهەڵنەگرە و دژی هەموو جۆرە یاسا و نەریتێکی نێودەوڵەتییە، هەروەها پێشێلکردن و بێڕێزییە بەرامبەر بە سەروەریی خاک و ئاسمانی عێراق.
باس لەوەش دەکات، “داوا لە حکومەتی فیدراڵ دەکەین، بێدەنگی بشکێنێت لەئاست ئەو پێشێلکارییانەی رۆژانە دەکرێنەسەر خاک و ئاسمانی عێراق و هەرێمی کوردستان، وە هەڕەشەیەکی جدییە بۆ سەر ژیانی هاوڵاتییانی مەدەنی”.
