پارێزگاری كەركوك رایدەگەیەنێت، خانووی زیادەڕەوی هاوڵاتییان ناڕوخێنن، بەڵكو ئەو دەڵاڵانە دەكەنە ئامانج كە دەست بەسەر زەویدا دەگرن و دەیانفرۆشنەوە.
رێبوار تەها، پارێزگاری کەرکوک رایگەیاند، ئیدارەی شار ماڵی هیچ هاوڵاتییەکی کەرکوک ناڕوخێنێت، بەڵکو رێوشوێن هەیە کە دەڵاڵ و دزەکان دەکاتە ئامانج، ئەوانەی دەست بەسەر دۆنمی زەویدا دەگرن و دەیبڕن بۆ فرۆشتن بۆ ئەوەی هەژاران تێوەگلێنن.
وتیشی، “رێگەنادەین دەڵاڵی زەوی و مافیاکان دەست بۆ سامانی گشتی ببەن و دۆخەكە قۆرغ بكەن و دەست بۆ بەرژەوەندیی هاوڵاتییان و خەڵكی هەژار ببەن”.
رێبوار تەها دووپاتیشیكردەوە كە رێنماییان داوەتە فەرماندەیی پۆلیسی کەرکوک و لیژنە پەیوەندیدارەکان بۆ گرتنەبەری رێوشوێنی یاسایی دژی ئەو باندانەی دەستدرێژی دەکەنەسەر زەوییەکانی دەوڵەت.
پارێزگاری كەركوك باسی لەوەشكرد، چیتر بێدەنگ نابن بەرامبەر ئەوانەی دەست بەسەر زەویدا دەگرن بۆ ئەوەی نەکرێتە پڕۆژەی خزمەتگوزاریی نوێ، قوتابخانە و بنکەی تەندروستی لە کەرکوک.
