وەزارەتی بەرگریی عێراق رایدەگەیەنێت، لایەنی فراوانکردنی هاوکارییەکانی نێوان سوپای عێراق و ناتۆ لە کۆبوونەوەیەکدا لەگەڵ وەفدێکی ئەو هاوپەیمانێتییە تاوتوێکرا.
لە راگەیەندراوێکدا وەزارەتی بەرگریی عێراق ئاماژەی بەوە کرد، ”بەمەبەستی بەرزکردنەوەی ئاستی کارەکان و پەرەپێدانی پەیوەندییەکان لەبواری پشتیوانی هێزەکاندا، حەمید عیناد، سەرۆک ئەرکانی سوپا لەگەڵ جیۆڤانی یانوچی، سەرۆکی نوێنەرایەتی ناتۆ لە عێراق کۆبووەوە”.
ئەوەشخراوەتەڕوو، ”لە میانی کۆبوونەوەکەدا لایەنەکانی هاوکاری و هەماهەنگی و فراوانکردنی هاوبەشی لەسەر ئاستی مەشق و راهێنان تاوتوێکران و گفتوگۆیان لەسەر کرا، هاوکات سەرۆکی نوێنەرایەتیی ناتۆ ئامادەیی خۆی بۆ پێشکەشکردنی ئامۆژگاری لە بواری پشتیوانی لۆجستی بۆ هێزەکانی عێراق دەربڕی”.
