پارێزگاری کەرکوک، جگە لەوەی لە راگەیەندراوەکانی خۆیدا چوار زمان بەکاردەهێنێت، فەرمانێکی ئیداری دەرکردووە و داوای لە هەموو فەرمانگە و دامەزراوە رەسمییەکانی شارەکە کردووە چوار زمان لە نووسراوەکانیاندا بەکاربهێنن.
بە گوێرەی فەرمانێکی رەسمی، کە کۆپییەکی دەست تۆڕی میدیایی ئێستا کەوتووە، لەمەودا دەبێت، زمانەکانی (کوردی، عەرەبی، تورکمانی، سریانی) لە هەموو نووسراوە رەسمییەکانی شارەکەدا بەکاربهێندرێن.
لە نووسراوەکەدا ئاماژە بەوەشکردووە، ئەو فەرمانە بەهۆی فرەپێکهاتەیی پارێزگای کەرکوکەوەیە و دەبێتە ناسنامەی تایبەتی شارەکە.
رێبوار تەها، پارێزگای نوێی کەرکوک، لە یەکەم ساتی دەستبەکاربوونییەوە تاوەکو ئەمڕۆ بەشێوەیەکی بەردەوامی پێداگری کردووە لەسەر خزمەتکردنی هەموو پێکهاتەکانی کەرکوک و پشتگوێنەخستنی هیچ کامێکیان.
