وتەبێژی یەكێتیی نیشتمانیی كوردستان رایدەگەیەنێت، هەموو ئەو دەنگە نەشازانەی لە بارەی كەركوكەوە قسەدەكەن كەركوكی نین، بۆیە گرنگە كەركوكییەكان بەیەكەوە كاربكەن و ئەو بڕیارە بدەن كە لە بەرژەوەندیی خەڵكی كەركوكدایە.
سەعدی ئەحمەد پیرە، وتەبێژی یەكێتیی نیشتمانیی كوردستان لە دیدارێكی تەلەفزیۆنیدا رایگەیاند، بەپێی ئەنجامی هەڵبژاردنەكان یەكێتی مافی خۆی بوو پۆستی پارێزگاری كەركوك وەربگرێت و كەركوكییەكان خۆشەویستییان بۆ یەكێتی رێگایان نەدا بەبێ یەكێتی حكومەتی خۆجێی پێكبهێندرێت.
وتیشی، “پارتی هەموو توانا ناوخۆیی و دەرەكییەكانی بەكارهێنا كە بەبێ یەكێتی حكومەتی خۆجێی كەركوك پێكبهێندرێت سەركەوتوو نەبوو و ئەگەر كۆبوونەوەی ئەنجومەنی پارێزگای كەركوك لە بارەگای پارتیش بكرایە هەر بەشداریی نەدەكرد”.
وتەبێژی یەكێتی دەشڵێت، “كار بۆ ئەوە دەكەین لە هەڵبژاردنی پەرلەمانی كوردستان سەركەوتن تۆماربكەین و زۆرینەی دەنگەكان بەدەستبهێنین”.
