سەرۆکى یەکێتى رایدەگەیەنێت، هەوڵەکانمان بۆ ئەوەیە هەڵبژاردنى ئەنجومەنى نوێنەرانى عێراف لە کەشێکی ئارام و دیموکراسیدا بەڕێوەبچێت.
بافڵ جەلال تاڵەبانی، سەرۆکی یەکێتیی نیشتمانیی کوردستان لە دەباشان پێشوازی لە تۆماس سیلەر، باڵیۆزی یەکێتیی ئەوروپا لە عێراق کرد.
لە کۆبوونەوەکەدا دۆخی گشتیی سیاسی و ئەمنی و ئابوریی هەرێمی کوردستان و عێراق و ناوچەکە تاوتوێکرا و، جەخت لە چارەسەرکردنی ئاشتییانەی هەموو ئەو کێشانە کرایەوە کە هەڕەشەن بۆ سەر سەقامگیریی رۆژهەڵاتی ناوەڕاست.
بافڵ جەلال تاڵەبانی و تۆماس سیلەر جەختیان لە برەودان بە پەیوەندییەکانی نێوان هەرێمی کوردستان و یەکێتیی ئەوروپا کردەوە و بەهێزکردنی هاوکاری و هەماهەنگییەکانیان بە پێویستزانی.
هەڵبژاردنی ئەنجومەنی نوێنەرانی عیراق تەوەرێکی دیکەی دیدارەکەبوو و بافڵ جەلال تاڵەبانی وتی، “هەوڵەکانمان بۆ ئەوەیە هەڵبژاردنەکە لە کەشێکی ئارام و دیموکراسیدا بەڕێوەبچێت”.
