کەشناسێک دەڵێت، “پلەکانی گەرمی لە ئاستێکی ئاساییدا دەبن کاتێک وردە وردە هاوین جێدەهێڵین و ئەو قسانە راست نین کە باس لەوەدەکەن، بەهێزترین شەپۆلی بەرزبوونەوەی پلەی گەرمی لە کۆتایی ئابدا تۆماردەکرێت”.
واسق سلامی، کەشناسێکی عێراقییە و دەڵێت، تاوەکو کۆتاییهاتنی هاوین چەند شەپۆلێکی بەرزبوونەوەی پلەی گەرمی تۆماردەکرێت، بەڵام هەموو ئەو شەپۆلانە ئاسایین و تاوەکو وردە وردە بەرەو پایز بڕۆین هێزی شەپۆلەکان کەمتر دەبنەوە، ئاماژەی بەوەشکردووە هاوین کۆتا هەناسەکانی دەدات و نزیک دەبێتەوە لە کۆتاییەکەی.
ئەمەش لە کاتێکدایە، رۆژ رووی لە کورتبوونەوە کردووە و ئێستا زووتر خۆرئاوابوون دەبیندرێت، وەک لە ماوەیەک بەر لە ئێستا، هەر بۆیە گەرمای رۆژ کەمتربووەتەوە و فێنکی شەو زیاتر بووە و کۆتاییەکانی ئاب سەرەتای ماڵئاواییکردنی وەرزی هاوین بەدیدەکرێت و بەقسەی شاڵاو هیدایەت، شارەزایی کەشناسی، وەرزی زستانی ئەمساڵ زووتر دێت و ساردتردەبێت.
