وەزارەتی خوێندنی باڵا و توێژینەوەی زانستیی هەرێم مەرج و پێوەرەکانی گواستنەوەی خوێندنی خوێندکارانی لە زانکۆ و پەیمانگا تایبەتەکان بڵاوکردەوە و دەڵێت، ”گواستنەوە تەنها دوای قۆناغی یەکەم دەبێت”.
لە راگەیەندراوێکدا وەزارەتی خوێندنی باڵا و توێژینەوەی زانستیی هەرێم لەو بارەیەوە ئەوەی خستەڕوو، ”گواستنەوە تەنها دوای قۆناغی یەکەم دەبێت و مەرجە خوێندکار لارینەبوونی هەردوو زانکۆ یاخود پەیمانگا بەدەستبهێنێت بۆ گواستنەوەی خوێندنەکەی و لە کۆتایی پڕۆسەکەشدا پێویستە وەزارەت پەسەندی بکات، هاوکات گواستنەوە لە 7ی ئاب دەستپێدەکات و لە 12ی ئەیلولی 2024 کۆتایی دێت”.
بەپێی رێنماییەکە، ”گواستنەوە و میوانداریکردن لە زانکۆ تایبەتەکان بۆ حکومییەکان رێگەپێدراو نییە، بەڵام گواستنەوە بە پێچەوانەوە لە هەمان بەش و پسپۆڕی بە مەرجی بەدەستهێنانی لارینەبوون رێگەپێدراوە، هاوکات گواستنەوە لە بەشێکەوە بۆ بەشێکی دیکە لە زانکۆ و پەیمانگا تایبەتەکان رێگەپێدراو نییە”.
سەبارەت بە گواستنەوەی خوێندن بۆ دەرەوە وەزارەتی خوێندنی باڵای هەرێم دەڵێت، ”بۆ هەموو بڕگەکانی گواستنەوە لە ناوەوە و دەرەوەی عێراق و هەرێمی کوردستان پێویستە رەچاوی (المقاصە و التحمیل) بکرێت کە لە زانکۆ حکومییەکانی هەرێمی کوردستان پەیڕەودەکرێت”.
بۆ خوێندنەوەی تەواوی مەرج و پێوەرەکان کلیک لێرە بکە.
