ئەنجومەنی نوێنەرانی ئەمریكا ڕەزامەندی پیشانداوە، بۆ ئەوەی داوا لە جێگری سەرۆكی ئەمریكا بكەن، ترەمپ لە پۆستەكەی لابدات.
ئەمڕۆ چوارشەممە 13ی كانونی دووەم، ڕۆیتەرز بڵاویكردووەتەوە، ئەنجومەنی نوێنەرانی ئەمریكا ڕەزامەندی پیشانداوە بۆ ئەو بڕیارەی كە داوا لە مایك پێنس، جێگری سەرۆكی ئەمریكا بكات مادەی 25ی دەستووی ئەو وڵاتە جێبەجێ بكات.
ئەو مادەیەی داواكراوە لەلایەن پێنس-ەوە جێبەجێ بكرێت، باس لە لابردنی دۆناڵد ترەمپ، سەرۆكی ئێستای ئەمریكا دەكات لەلایەن جێگرەكەیەوە.
بەڵام پێشتر لە نامەیەكدا كە بۆ ئەو ئەنجومەنەی ناردبوو، مایك پێنس هیوای خواست داوای لێنەكرێت ئەو مادە دەستوورییە جێبەجێ بكات، چونكە رایگەیاندبوو، “لە بەرژەوەندیی ئەمریكا-دا نییە”.
مایك پێنس لەو نامەیەدا ئاماژەی بۆ ئەوەش كردبوو، لەگەڵ مانەوەی ترەمپ-دایە لە پۆستەكەی بۆ ماوەی ئەو هەشت ڕۆژەی كە ماویەتی.
هەوڵەكان بۆ لابردنی ترەمپ لە پۆستەكەی پاش ئەو خۆپیشاندانە دێت كە ڕۆژی چوارشەممەی ڕابردوو لە بەردەم كۆنگرێسی ئەمریكا ڕویدا، كە چەند خۆپیشاندەرێك هەڵیانكوتایە سەر تەلارەكە و پێنج كەسیش لە خۆپیشاندەران و هێزە ئەمنییەكان كوژران.
