وەزیری كۆچ گەڕانەوەی 463 ئاوارە بەشێوەی خۆویستانە بۆ ناوچەكانیان لە شەنگال رادەگەیەنێت.
ئیڤان فایەق، وەزیری كۆچ و كۆچبەرانی عێراق رایگەیاند، 463 ئاوارە لە كامپی شاریاوە لە پارێزگای دهۆك بەشێوەی خۆویستانە گەڕاونەتەوە بۆ ناوچەكانی خۆیان لە قەزای شەنگالی سەر بە پارێزگای نەینەوا.
وتیشی، “خێزانە گەڕاوەكان چەكی مینحەی گەڕانەوە و هاوكاری دەیانگرێتەوە، بەپێی رێنماییەكانی محەمەد شیاع سودانی سەرۆك وەزیران بۆ كۆتاییهێنان بە دۆسیەی ئاوارەبووان و داخستنی كامپەكان”.
ئیڤان فایەق روونیشیكردەوە، پرۆسەی گواستنەوەی خێزانەكان و كەلوپەلەكانیان بە هەماهەنگی لەگەڵ رێكخراوی كۆچی نێودەوڵەتی (IOM) و بە هەماهەنگی لەگەڵ هێزە ئەمنییەكان و بەرپرسانی كارگێڕیی پارێزگاكانی دهۆك و نەینەوا ئەنجامدراوە.
