ئەمڕۆ وادەی تۆماركردنی ناوی كاندیدان بۆ هەڵبژاردنی پەرلەمانی كوردستان كۆتایی پێدێت و بەرپرسێكی كۆمسیۆن دەڵێت، لە سلێمانی و هەڵەبجە 41 كاندیدی سەربەخۆ ناوی خۆیان تۆماركردووە.
ئامانج عەزیز، بەڕێوەبەری نووسینگەی سلێمانی كۆمسیۆنی باڵای سەربەخۆی هەڵبژاردنەكان بە تۆڕی میدیایی ئێستای راگەیاند، لە هەردوو بازنەی سلێمانی و هەڵەبجە 41 كاندیدی سەربەخۆ ناویان تۆماركردووە، كە شەشیان توركمان و چواریشیان مەسیحین.
وتیشی، “سەرجەم كاندیدان داواكارییان پێشكەشكردووە و لیستەكانیشیان گەڕاندووەتەوە”. ئەوەشی وت، لەسەر ئاستی لایەنەكانیش 12 پارتی سیاسی و دوو هاوپەیمانی ناوی خۆیان تۆماركردووە.
ئەمڕۆ دوا وادەیە بۆ پێشكەشكردنی ناوی كاندیدانی لیست و پێكهاتەكان، ئامانج عەزیز روونیكردەوە، پێشتر دووشەممەی رابردوو 15ی ئەم مانگە وەك دوا وادە دیاریكرابوو، دواتر ئەنجومەنی كۆمسیۆن بۆ ئەمڕۆی درێژكردەوە و هەر بڕیارێكیش دەربارەی كۆتاییهاتنی ماوەكە یان درێژكردنەوەی لە دەسەڵاتی ئەنجومەنی كۆمسیاراندایە.
پاش تۆماركردنی ناوی كاندیدان، لیژنەی وردبینیی كۆمسیۆن وردبینی بۆ داتا و زانیارییەكانی كاندیدان دەكات، دواتریش ئاراستەی لایەنە پەیوەندیدارەكانی وەك دەستەی دەسپاكی و بەڵگە و تاوان دەكرێت بۆ ئەوەی بزانرێت تا چەند مەرجەكانیان تیایە، ئامانج عەزیز وای وت.
ئەوەشی خستەڕوو، قۆناغی دواتریش ئەنجامدانی تیروپشك دەبێت بۆ ژمارەی لیست و كاندیدە سەربەخۆكان.
دەربارەی تۆماركردنی كارمەندی سەرپەرشتیاری رۆژی دەنگدانیش، بەرپرسەكەی كۆمسیۆن ئاشكرایكرد، تۆماركردنی كارمەندان تا 23ی ئەم مانگە بەردەوام دەبێت و فەرمانبەران، دەرچووان یان خوێندكارانی زانكۆ و پەیمانگاكان ئەوانەی بڕوانامەی لە سەروو ئامادەییان هەیە دەتوانن داواكاری پێشكەش بكەن.
