سەرۆكایەتیی شارەوانیی سلێمانی رایدەگەیەنێت، چاوەڕواندەكرێت كۆمپانیای جێبەجێكاری پڕۆژەی شەقامی 100 مەتریی سلێمانی ستاف و كاتەكانی كاركردن بۆ پڕۆژەكە زیادبكات بۆ ئەوەی بە زووترین كات ئەم پڕۆژە گەورەیە بخرێتە خزمەتی دانیشتووانی شاری سلێمانییەوە.
بەپێی راگەیەندراوێكی سەرۆكایەتیی شارەوانیی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای ئەوەی رۆژی یەكشەممەی رابردوو سەرۆكی شارەوانیی سلێمانی سەردانی پڕۆژەی شەقامی 100 مەتری كرد و كۆبوونەوەی لەگەڵ ئەندامانی بۆردی بەڕێوەبردنی پڕۆژەكە ئەنجامدا، ئەمڕۆ لە تەلاری سەرۆكایەتیی شارەوانیی سلێمانی بە ئامادەبوونی بەڕێوەبەری ڕێپێدراوی كۆمپانیای جێبەجێكار و ئەندامانی بۆردی بەڕێوەبردنی پڕۆژەی شەقامی 100 مەتری كۆبوونەوەیەك ئەنجامدرا بۆ تاوتوێكردنی كارەكانی پڕۆژەكە.
هەر لە راگەیەندراوەكەدا هاتووە، لەبەر گرنگی و گەورەیی ئەم پڕۆژەیە هەنگاوی زۆر باش نراوە بۆ پشتیوانی كۆمپانیای جێبەجێكار تاوەكو بتوانێت كارەكانی خێراتر و باشتربكات كە رێژەی كاركردن لە پڕۆژەكەدا 61%ە، لە رووی داراییەوە پاڵپشتی كۆمپانیای جێبەجێكاركراوە بۆیە چاوەڕواندەكرێت كۆمپانیای جێبەجێكار ستاف و كاتەكانی كاركردن بۆ پڕۆژەكە زیادبكات بۆ ئەوەی بە زووترین كات ئەم پڕۆژە گەورەیە بخرێتە خزمەتی دانیشتووانی شاری سلێمانییەوە.
