ماوەی نزیکەی دوو مانگە سەنتەری ڕوناکبیریی کەرکوک بەبێ بەرپرس ماوەتەوە و دوای ئەنجامدانی ڕێوڕەسمی”ساڵیادی کوژرانی قاسم سولەیمانی و ئەبومەهدی موهەندیس” لە سەنەتەرەکەدا بڕیاردراوە تا کاتێکی نادیار دابخرێت.
کارمەندێکی سەنتەرەکە بە تۆڕی میدیایی ئێستای ڕاگەیاند، “بەهۆی ئەوەی سەنتەرەکە بەرپرسی نییە و ماوەی دوو مانگە بەڕێوبەری سەنتەرەکە بە نەخۆشیی کۆرۆنا گیانی لە دەستداوە و تا ئێستا بێ بەڕێوبەر ماوەتەوە، تا ڕێکخستنەوەی کارەکانی دەرگای سەنتەرەکە دادەخرێت”.
ئەو کارمەندەی سەنتەرەکە ئەوەشی ئاشکراکرد، کە ناکۆکی هەبووە لە بەڕێوبردنی کارەکانی سەنتەرەکە، بۆیە تا ڕێکخستنەوە و کاڵکردنەوەی ناکۆکییەکان دەرگای سەنتەرەکە بە داخراوی دەمێنێتەوە.
سەنتەری ڕوناکبیریی کەرکوک پێشتر لەلایەن مام جەلال، سەرۆککۆماری پێشووتری عێراق-ەوە، وەک دیارییەک پێشکەشی خەڵکی شاری کەرکوک کراوە و پێشتریش لە کاتی کردنەوەی سەنتەرەکەدا بڕیاردراوە کە کۆی پێکهاتەکانی کەرکوک بتوانن چالاکی و ڕێوڕەسمە هونەرییەکانیان لەو سەنتەرەدا ئەنجامبدەن و تەنها موڵکی کورد یان لایەنێکی کەرکوک نەبێت.
لەژێر ئەم دروشمەدا دوو ڕۆژ پێش ئێستا “ساڵیادی کوشتنی قاسم سولەیمانی و ئەبومەهدی موهەندیس” لە سەنتەرەکەدا کرایەوە و دوای ئەوە بڕیاری داخستنی سەنتەرەکە دراوە.
