بەهۆی شەڕەتەقەوە، کەسێک لە چەمچەماڵ كوژراوە و دوو کەسیش برینداربوون.
بە گوێرەی زانیارییە سەرەتاییەكان، شەڕەكە ئەمشەو 11ی كانونی دووەم لە گەڕەکی ڕاپەڕین لە ناو قەزای چەمچەماڵ ڕویداوە، دوای تەقەكردنەكان، کەسێک كوژراوە و دوو کەسیش برینداربوون.
لەو بارەیەوە، نەقیب- سەركەوت ئەحمەد، وتەبێژی پۆلیسی پارێزگای سلێمانی لە لێدوانێكدا بۆ “تۆڕی میدیایی ئێستا” هەواڵەكەی پشتڕاستكردەوە و ڕایگەیاند، “سێ كەس پێكەوەبوون، ئۆتۆمبیلێكی جۆری نیسان پاترۆڵ بەلایاندا تێپەڕیوە و شۆفێرەكە تەقەی لێكردوون، بەهۆیەوە كەسێكیان كوژراوە و دووانەكەی تر برینداربوون.”
وتیشی، “شۆفێرەكە كێشەی لەگەڵ كوژراوەكەدا هەبووە، بەڵام بەهۆی تەقەكردنییەوە دوو كەسەكەی تریش برینداربوون.”
“هێزەكانی پۆلیس و تیمەكانی بەڵگەی تاوان، گەیشتوونەتە شوێنی ڕوداوەكە و لێكۆڵینەوەیان لەبارەیەوە دەستپێكردووە.” وتەبێژی پۆلیسی پارێزگای سلێمانی ئەوەی بە ئێستا ڕاگەیاند.
