وەزارەتی ڕۆشنبیری سەبارەت بە سووتاندنی كتێبخانەی گشتیی پیرەمەگرون دەڵێت، ناکرێت بۆ بەدەستهێنانی خواست و داواکاریی توێژێک، فەرمانگە و دامەزراوە و ئاڵا بکەونە بەر هێرش و سووتاندن و وێرانکاریی.
وتەبێژی وەزارەتی ڕۆشنبیری و لاوانی حكومەتی هەرێمی كوردستان ڕوونكردنەوەیەكی بڵاوكردەوە و تیایدا هاتووە، ئەمڕۆ لە ئەنجامی ناڕەزایەتیی خوێندکارانی زانکۆ لە سنووری پارێزگای سلێمانی، بەداخەوە “دەستێکی گێرەشێوێن” لە ناحیەی پیرەمەگرون هەڵیانکوتاوەتەسەر چەند فەرمانگەیەک، لەناویاندا کتێبخانەی گشتیی پیرەمەگرون، ئاگریان تێبەرداوە.
وەزارەتەكە پشتیوانی بۆ هەموو داوایەکی مەدەنییانەی چین و توێژەکانی کۆمەڵگا دەردەبڕێت، بەڵام دەڵێت، “بەتوندی سەرکۆنەی هەموو کارێکی تێکدەرانە دەکەین”.
وەزارەتی ڕۆشنبیری دووپاتیشیدەكاتەوە، سوکایەتیکردن بە ئاڵای پیرۆزی کوردستان و ڕەمز و سیمبولە نەتەوەییەکانمان و پەلاماری کتێبخانە، کارێکی دوور لە ڕەوشتی شارستانییە، ناکرێت بۆ بەدەستهێنانی خواست و داواکاریی توێژێک، فەرمانگە و دامەزراو و ئاڵا بکەونەبەر هێرش و سووتاندن و وێرانکاریی.
