بافڵ جەلال تاڵەبانی، سەرۆكی یەكێتیی نیشتمانیی كوردستان لە بەغداد چاویكەوت بە فایەق زێدان، سەرۆكی ئەنجومەنی باڵای دادوەریی عێراق.
لە دیدارێكدا سەرۆك بافڵ جەلال تاڵەبانی لە نزیكەوە پشتگیریی خۆی و یەكێتی دووپاتكردەوە بۆ سەربەخۆیی دامەزراوەی دادوەریی عێراق و پێزانینی بێپایانی بۆ پێگە و رۆڵی فایەق زێدان دەربڕی كە لەرابردوودا نیشتمانییانە و دادپەروەرانە لەخزمەتی بەدیهێنانی ئامانجە باڵاكان و پاراستنی دەستوور بووە، رایگەیاند، “بەتوندی ئیدانەی هەر بێڕێزی و دەستبردنێك بۆ سەروەری و سەربەخۆیی دامەزراوەی باڵای دادوەریی عێراق و سەرۆكەكەی دەكەین”.
هەر لە دیدارەكەدا فایەق زێدان، سەرۆكی ئەنجومەنی باڵای دادوەریی عێراق سوپاس و پێزانینی بۆ سەرۆك بافڵ و یەكێتی دەربڕی و پشتیوانییەكانیانی بە دەرفەت و هاندانی زیاتر وەسفكرد بۆ پاراستنی سەربەخۆیی دەسەڵاتی دادوەری لە عێراق و پابەندبوون بە یاسا بەركارەكان و پاراستنی مافە یاسایی و دەستوورییەكان لەوڵاتدا، هاوكات باس لە میكانیزمەكانی پەرەپێدان و پێشخستنی توانا زانستی و یاساییەكانی دادوەران و ئەندامانی داواكاری گشتی لە سەرۆكایەتیی دادگای تێهەڵچوونەوەی ناوچەی سلێمانی و گەرمیان كرا.
لەبەشێكی تری دیدارەكەدا جەخت لە بەردەوامیی دیالۆگی نیشتمانیی و چارەسەركردنی دەستوورییانەی سەرجەم كێشەكان كرایەوە بەشێوەیەك مافی هەموولایەك لەچوارچێوەی دەسەڵاتی دادوەریدا پارێزراوبێت.
