داواکاری گشتیی ئوردن بڕیاریدا بە داخستنی سێ کۆمپانیا بەهۆی دۆسیەی گیانلەدەستدانی حاجییانی ئەو وڵاتەوە کە لە رێگەی فەرمانگە تایبەتەکانەوە ئەو گەشتەیان ئەنجامنەداوە و لە دەرەوەی نوێنەرایەتیی رەسمی ئوردن رۆیشتوون.
لە راگەیەندراوێکدا داواکاری گشتیی ئوردن ئاماژەی بەوە کرد، ”ژمارەی ئەو کەسانەی لە دۆسیەی گیانلەدەستدانی حاجییانەوە تێوەگلاون و دەستبەسەرکراون بۆ 27 تۆمەتبار بەرزبووەتەوە”.
هەر سەبارەت بەو دۆسیەیە، داواکاری گشتی بڕیاریدا دەست بەسەر پارە و داهاتی ئەو کۆمپانیایانەدا بگرێت کە لەرێگای حەجی بازرگانییەوە دەستیانکەوتووە.
پێشتر حکومەتی ئوردن رایگەیاندبوو، ژمارەی گیانلەدەستدانی ئەو حاجییانەی لەدەرەوەی ئەرکی فەرمی حکومی چوون بۆ حەج بۆ 99 کەس بەرزبووەوە و بەپێی وتەکانی موهەنەد موبەیزین، وتەبێژی حکومەتی ئەو وڵاتە ئەو کەسانە لەلایەن چەند کۆمپانیایەکەوە فریودراون.
