لە ئاوەڕۆیەکی کەمپی زانکۆی تەکساس لە ئەمریکا، تەقینەوەیەک روویدا و بووەهۆی پچڕانی کارەبا.
پاش رووداوەکە، پۆلیسی ئەو زانکۆیە باری نائاسایی راگەیاند و بەپێی میدیاکانی ئەمریکا، تەقینەوەکە کاریگەریی لەسەر چەند شوێنێکی ناو کەمپەکە هەبووە، وەک سەنتەری زانستە تەندروستییەکان و بینای سەرەکیی بەشی ئەندازیاری.
بەپێی راپۆرتی پۆلیس، هۆکاری تەقینەوەکە دزەکردنی غاز بووە و بەهۆیەوە کارەبای زانکۆکە پچڕاوە.
زانکۆکە ئاگادارییەکی بۆ خوێندکاران ناردووە و داوای لێکردون، ئەگەر لە ناوچە زیانلێکەوتووەکاندا بن، بەزووترین کات شوێنەکانیان بەجێبهێڵن، هەروەها داوای لە خەڵک کردووە خۆیان لە کەمپەکە بەدووربگرن.
