ئومێد خۆشناو، پارێزگاری هەولێر لەبارەی کێشەی نەبوونی ئاوی هەولێرەوە رایگەیاند، کێشەی سەرەکیمان نەبوونی کارەبایە و کاتێکیش دەڵێین دەست بە ئاوەوە بگرن رەخنەمان لێدەگرن.
لە کۆنگرەیەکی رۆژنامەوانیدا دەربارەی کێشەی نەبوونی ئاو پارێزگاری هەولێر ئەوەی خستەڕوو، ”بەبەردەوامی کێشەی نەبوونی ئاو لە هەولێر لە وەرزی هاویندا هەیە و ئەوە کێشەی ساڵێک و چەند ساڵێک نییە، کاتێکیش بە هاوڵاتییان دەڵێین دەست بە ئاوەوە بگرن رەخنەمان لێدەگرن”.
ئاماژەی بەوەشکرد، ”ئاوی زیاترمان هەبووە لەو رێژەیەی پێوەرە جیهانییەکان بۆ هەرکەسێکی دیاریکردووە و دەبوو کێشەکە چارەسەر بووایە چونکە ئەمساڵ رێژەیەکی زۆر بارانباریوە”.
سەبارەت بە کێشە سەرەکییەکە ئومێد خۆشناو دەڵێت، ”کێشەی سەرەکی ئێمە نەبوونی کارەبایە و بڕیاربوو وەزارەتی کارەبا، کارەبای 24 کاتژمێرییمان بۆ دابینبکات بەڵام بۆمان نەکرا، ئێستا ئێمە بەناچاری کارەبا لە موەلیدەکان وەردەگرین و ئەوەش بارگرانیی زۆری لەسەر حکومەتی دروستکردووە”.
