دوو بەلەمی كۆچبەران لە ئاوەكانی یۆنان و ئیتاڵیا نوقمبوون و سەرۆكی كۆمەڵەی پەنابەرە گەڕاوەكان وردەكارییەكەی ئاشكرادەكات.
بەكر عەلی، سەرۆكی كۆمەڵەی پەنابەرە گەڕاوەكان لە هەرێم بە تۆڕی میدیایی ئێستای راگەیاند، بەلەمێكی كۆچبەران لە نزیك ئاوەكانی ئیتاڵیا بە 61 سەرنشینەوە ژێرئاوكەوت و دوای بەهاناوەچوونی پۆلیسی دەریاوانی ئیتاڵیا توانرا 12 كۆچبەریان رزگاربكرێن.
وتیشی، “كەشتییەكی گەورەی بارهەڵگر بەسەر رووداوەكەدا چووە و، پۆلیسی دەریاوانیی ئیتاڵیای ئاگاداركردووەتەوە”.
بەكر عەلی باسی لەوەشكرد، دواتر كۆچبەرێك لەنێو 12 كۆچبەرە رزگاركراوەكە گیانی لەدەستدا، 49 كۆچبەرەكەی دیكەش بێسەروشوێنن.
روونیشیكردەوە، بەشێكی بەرچاوی كۆچبەرانی ئەو بەلەمە كوردی رۆژهەڵات و باشووری كوردستانن، كۆمەڵەكەیان بەدواداچوون بۆ زانینی ناسنامەی رزگاربووان و قوربانییان دەكەن.
سەرۆكی كۆمەڵەی پەنابەرە گەڕاوەكان ئەوەشی خستەڕوو، هەر ئەمڕۆ بەلەمێك لە ئاوی یۆنان بە 58 سەرنشینەوە ژێرئاوكەوت.
وتیشی، “لەو بەلەمەشدا 10 كۆچبەر بوونەتە قوربانی، بەڵام ناسنامەیان نەزانراوە”.
ئاماژەی بەوەشدا، نازانن لەو بەلەمەدا چەند كۆچبەری كورد بوونیان هەیە، ئەندامانی كۆمەڵەكەیان سەرگەرمی زانینی چارەنووس و شوناسیانن.
#ئێستا
