عەممار حەکیم سەرۆکی رەوتی حیکمە رایگەیاند، ناکرێت ناکۆکییە سیاسییەکان لە عێراق ببنە هۆی ئەوەی نەتوانرێت کاندیدێکی گونجاو بۆ پۆستی سەرۆکی ئەنجومەنی نوێنەران هەڵبژێردرێت و داوایکرد بە زووترین کاتدا ئەو پرسە یەکلایی بکرێتەوە.
لە وتاری جەژنی قورباندا عەممار حەکیم رایگەیاند، ناکرێت پۆستێک هۆکاری کێشە و ناکۆکی سیاسیی بێت لەنێوان یەک پێکهاتەدا، هێزمان لە یەکێتیدایە، ئەمەش بەبێ سازشکردن بەدی نایات.
ئاماژەی بەوەشکرد، قۆناغی ئێستا هاوکاری و پاڵپشتی هەمووانی لە بەدیهێنانی بەرژەوەندییە نیشتمانییە باڵاکان دەوێت، پێویستە بە زووترین کات و بێدواکەوتن پۆستی سەرۆکی ئەنجومەنی نوێنەران یەکلاییبکرێتەوە.
هاوکات هۆشداری لە کاریگەریی بەتاڵی پۆستی سەرۆکی ئەنجومەنی نوێنەرانی عێراق بۆ ماوەی حەوت مانگ لەسەر پرۆسەی سیاسی و ئاسایش و دۆخی سیاسیی دا.
