قوباد تاڵەبانی، جێگری سەرۆك وەزیران، لە بەردەوامی سەردانەكەیدا بۆ ئیدارەی راپەڕین، پڕۆژەكانی شەقامی 60 مەتریی قەڵادزێ و بە یاوەری وەزیری تەندروستی و بریكاری وەزیر نەخۆشخانەی ژنان و منداڵبوونی قەڵادزێی بەسەركردەوە.
لە سەردانەكەیدا، قوباد تاڵەبانی رایگەیاند، بودجەی پێویست بۆ هەردوو پڕۆژەكە دابینكراوە و جەختیشیكردەوە لەسەر بەردەوامبوونی كاركردن لە هەردوو پڕۆژەكە و تەواوبوونیان لە نزیكترین ماوەدا.
شەقامی 60 مەتری پڕۆژەیەكی گرنگ و ستراتیژییە بۆ قەڵادزێ و بە تەواوبوونی قەرەباڵغی بە رێژەیەكی بەرچاو لەناو شارۆچكەكە كەم دەكاتەوە و رێگریش دەكات لە هاتوچۆی بارهەڵگرەكان بەناو شارۆچكەكەدا.
بە تەواوبوونی نەخۆشخانەی ژنان و منداڵبوونیش، بۆشاییەكی گەورەی كەرتی تەندروستیی قەڵادزێ پڕدەبێتەوە، بەوپێیەی تا ئێستا ئەو شارۆچكەیە نەخۆشخانەی ژنان و منداڵبوونی نەبووە.
