وەزارەتی خوێندنی باڵا و توێژینەوەی زانستی رایدەگەیەنێت، بەمەبەستی دامەزراندن، سبەی لیستی ناوی سێ یەکەمەکان ئاراستەی ئەنجومەنی وەزیران دەکەین.
وەزارەتی خوێندنی باڵا و توێژینەوەی زانستیی هەرێم لە راگەیەندراوێکدا بڵاویکردەوە، وەزارەتەکەیان کۆبونەوەیەکى تایبەتی لەگەڵ لایەنە پەیوەندیدارەکانی وەزارەت ئەنجامدا بۆ هەنگاوە کۆتاییەکانی ئامادەکاری و هەماهەنگی بۆ دامەزراندنى سێ یەکەمەکانى سەر بەشەكان لە دەرچووانی ساڵانی خوێندنى (2017 – 2018) تاکو (2022 – 2023)، کە وابڕیارە سبەی لیستی کۆتایی ناوەکانیان ئاراستەی ئەنجومەنی وەزیران بکرێت.
بەپێی راگەیەندراوەکە، لەو کۆبونەوەیەدا کە ئەمڕۆ دووشەممە بە سەرپەرشتیی د. ئارام محەمەد، وەزیرى خوێندنى باڵا و توێژینەوەى زانستى و ئامادەبونی لایەنە پەیوەندیدارەکان لە دیوانی وەزارەت بەڕێوەچوو، وەزیری خوێندنی باڵا رایگەیاند، دامەزراندنى سێ یەکەمەکان بە ئەرکى لە پێشینەى خۆمان دەزانین و لە ماوەى رابردوودا هەموو هەوڵێکمان لەو بوارەدا خستووتەگەر، چونکە ئەوە مافێکى یاسایی و ئاسایی خۆیانە.
دەشڵێت، لەم قۆناغەشدا پێویستە هەموان پێکەوە هەماهەنگ و هاوکارى یەکتر بین، بۆ ئەوەى مافى هیچ یەکێک لە سێ یەکەمەکان نەفەوتێ، بۆیە دەبێ لە تۆمارکردنى ناوى چواریان و بەشەکانیان و تەواوى زانیارییەکان ورد بین و نابێت هیچ جۆرە کەمتەرخەمییەک لەم روەوە هەستى پێبکرێت.
وەزیری خوێندنی باڵا ئەوەش دەڵێت، ساڵانى رابردوو بەهەوڵەکانى وەزارەتی خوێندنى باڵا و توێژینەوەى زانستى توانرا سێ یەکەمەکانى ساڵانى (2015-2016) و (2016-2017) دابمەزرێنین.
