بەڕێوەبەری نووسینگەی حەج و عومرەی سلێمانی، رایگەیاند، بۆ تۆمارکردنی ناوی حاجییان بە ئەلیکترۆنی هیچ بڕەپارەیەک وەرناگیرێت.
تەها سەعید، بەڕێوەبەری نووسینگەی حەج و عومرەی سلێمانی، بە تۆڕی میدیایی ئێستای راگەیاند، پێویستە هەر کەسێک کە ناوی خۆی لە پرۆسەی بەئەلیکترۆنیکردن بۆ حەج تۆماردەکات بایۆمەتری هەبێت، چونکە وەکو بانکی زانیارییە و گرنگە، هەروەها کارتی نیشتمانی، وێنە و کارتی زانیاری پێویستە هاوشێوەی رابردوو کە فۆڕم بۆ ناونووسین پڕدەکرایەوە.
وتیشی، لە رابردوودا بۆ تۆمارکردنی ناوی حاجییان بڕێک پارە وەردەگیرا، بەڵام ئەمساڵ و لە پرۆسەی بە ئەلیکترۆنیکردن هیچ بڕەپارەیەک وەرناگیرێت.
باسی لەوەشکرد، پرۆسەکە ماوەی دوو رۆژە دەستیپێکردووە و 40 رۆژ بەردەوامدەبێت، زۆر روونە و هاوڵاتی خۆی دەتوانێت لە تیروپشکی ناوکاندا چاودێریی ناوەکەی بکات.
