قائیمقامیەتی سلێمانی بڕیاریدا قەدەغەی هاوردەکردنی مریشک و هێلکە بەردەوامبێت و هاوردەکردنی گۆشتی سوور و ئاژەڵی زیندوو و ماسی کراوەبێت.
قائیمقامیەتی سلێمانی لە راگەیەندراوێکدا بڵاویکردەوە، لە دوو کۆبوونەوەدا کە نوێنەری ڤێتێرنەری، ئاسایشی ئابوری، کشتوکاڵ، چاودێریی بازرگانی، کۆمەڵەی کێڵگە پەلەوەرییەکان، سەندیکای عەلوە بەشداربوون، بڕیاردرا لەپێناو کوالێتی و بڕی بەرهەمی ناوخۆیی و گونجاندنی لەگەڵ دۆخی ئابوریی هاوڵاتییان چەند رێکارێک بگیرێنەبەر، لەوانە بڕیاری قەدەغەکردنی هاوردەکردنی مریشک و هێلکە بەردەوامبێت و لەهەمانکاتدا بڕی هاوردەکردنی گۆشتی سوور و ئاژەڵی زیندوو و ماسی کراوەبێت.
بەپێی راگەیەندراوەکە، لە کۆبوونەوەکاندا پێداچونەوە بە مۆڵەتپێدانی کێڵگە پەلەرەوەرییەکان و درووستکردنی هەماهەنگیی زیاتر لەگەڵ ناوچەکانی ناوەڕاست و باشووری عێراق کرا بۆ ئاڵوگۆڕی بەرهەمی ناوخۆیی.
قائیمقامیەتی سلێمانی، ئاماژە بەوەش دەکات، جەختکرایەوە کە بەروبوومە ناوخۆییەکان لەرووی کوالێتی و بڕەوە گرنگییان پێبدرێت، هاوکات گرنگیی زیاتر بە ساردکەرەوەکان و هەڵگرتنی سەوزەو میوە بدرێت بۆئەوەی زیاتر سود لە بەروبومی ناوخۆ وەربگیرێت.
