هێڵی ئاسمانی عێراقی لە ماوەی هەفتەی یەکەمی دەستپێکردنی گواستنەوەی حاجییان بۆ سعودیە رایگەیاند، زیاتر لە حەوت هەزار حاجی عێراق گواستراونەتەوە و دەشڵێت، “بڕیارە ژمارەی گەشتەکان زیادبکەین”.
مناف عەبدولمنعیم، بەڕێوەبەری گشتیی کۆمپانیای هێڵی ئاسمانیی عێراقی رایگەیاند، تا ئێستا 7 هەزار و 34 حاجی عێراق لە رێگەی ئاسمانییەوە گواستراونەتەوە بۆ سعودییە.
ئاماژەی بەوەشکردووە، رێکارەکانی گواستنەوەی ئاسمانی زۆر بە باشی بەڕێوەدەچێت و هەموو تواناکان بەکارهێنراون بۆ دابینکردنی هەموو ئامرازەکان ئاسوودەیی بۆ حاجییان.
ئەوەش خراوەتەڕوو، بڕیارە ژمارەی گەشتەکانی رۆژانەی کۆمپانیای نیشتمانیی فڕۆکەوانی بۆ فڕۆکەخانەکانی سعودیە زیادبکرێن و ئەوەش بە هەماهەنگی دەبێت لەگەڵ دەستەی باڵای حەج و عومرەی عێراق و بەرپرسانی سعودی.
