لە ماوەی ساڵی ڕابردوودا لە شارەكانی ڕۆژهەڵاتی كوردستان دەیان كەس بە هۆكارەكانی خێزانی و هەژاری كۆتاییان بە ژیانی خۆیان هێناوە، وەك ئەوەی ڕێكخراوێكی بواری مافی مرۆڤ ئاماژەی پێداوە.
ڕێكخراوی مافی مرۆڤی هەنگاو ئەمڕۆ شەممە 9ی كانونی دووەم ئامارێكی تایبەت بە ڕوداوەكانی ساڵی 2020 بڵاوكردەوە و تیایدا دەڵێت، لانیكەم 225 هاوڵاتی لە شارە جیاوازەكانی ڕۆژهەڵاتی كوردستان كۆتاییان بە ژیانی خۆیان هێناوە.
بەپێی ئامارەكە، لەو ژمارەیە 122یان پیاو و 103 كەسیان ژن بوونن و، 45 حاڵەتیان كە دەكاتە 20%ی كۆی حاڵەتەكان مێردمنداڵ و تەمەنیان لە خوار 18 ساڵەوە بووە.
ڕێكخراوەكە ئاماژەی بەوەشكردووە، زۆرترین ڕێژەی خۆكوشتن لە پارێزگای سنە بووە بە 77 حاڵەت.
دەبارەی هۆكارەكانی پاڵنەری ئەو ڕوداوانەش ڕونیكردوەتەوە، (كێشەی خێزانی 114 حاڵەت، هەژاری و بێكاری 68، نادیار 29، كێشەی دەرونی 10، بەشودانی زۆرەملێ 3 و هۆكاری سیاسی 1 حاڵەت) بووە.
ماوەی چەند ساڵێكی دۆخێكی ئابوریی سەخت ڕووی لە ڕۆژهەڵاتی كوردستان و ئێران كردەوە بەهۆی ئەو سزایانەی لەلایەن ئەمریكاوە بەسەر ئەو وڵاتەدا لە ئاكامی بەرنامە ئەتۆمییەكانی و دەستێوەردانی لە كاروباری وڵاتانی دەوروبەردا دراوە.
ئەوەی لە ساڵی ڕابردوودا باری سەرشانی هاوڵاتییانی قورستركردووە پەتای كۆرۆنایە كە هێندەی تر باری ئابوری خێزانەكانی قورستر كردووە.
