حكومەتی هەرێم رایدەگەیەنێت، هاوڵاتییان دەتوانن لە رێگای وێبسایتی وەزارەتی ناوخۆوە ڤیزا وەربگرن.
فەرمانگەی میدیا و زانیاریی حكومەتی هەرێم رایگەیاند، گەشتیاران دەتوانن لە رێگای وێبسایتی وەزارەتی ناوخۆوە ڤیزا بە شێوەی ئۆنلاین وەربگرن، بۆ ئەو مەبەستە ئێستا پێدانی ڤیزا بە گەشتیارانی بیانی بە دوو شێواز دەكرێت.
ئاماژە بۆ ئەوەش كراوە، ڤیزای ئۆنلاین كە پێشووەختە گەشتیاران لە رێگای وێبسایت، لە وەزارەتی ناوخۆی داوادەكەن و دوای رەزامەندی، ڤیزاكە وەردەگرن.
لەبارەی ڤیزای ئۆن ئەراڤڵیش رایگەیاندووە، ئەو ڤیزایەیە كە هەڵگرانی پاسپۆرتی (53) وڵات دەتوانن لە كاتی هاتنیان بۆ هەرێمی كوردستان لە فڕۆكەخانە وەریبگرن و پێویست بە داواكاریی پێشوەختە ناكات.
سەبارەت بە وەرگرتنی ڤیزای خۆڕایی فەرمانگەی میدیا و زانیاری لە زاری ئەحمەد هۆشیار، بەڕێوەبەری گشتیی فڕۆكەخانەی نێودەوڵەتیی هەولێر ئاماژەی بۆ ئەوەش كردووە، ئەو وڵاتانەی كە ڤیزا بەخۆڕایی و بێبەرامبەر دەدەنە هاوڵاتییانی خاوەن پاسپۆرتی عێراقی، بە هەمان شێوە هاوڵاتیی ئەو وڵاتانە، كە دێنە عێراق یان هەرێمی كوردستان بێبەرامبەر دەتوانن ڤیزا وەربگرن.
فەرمانگەی میدیا و زانیاریی حكومەتی هەرێم دەشڵێت، گەشتیاران لەرێگای كارتی بانكییەوە و بڕی (72) دۆلار لە بەرامبەر وەرگرتنی ڤیزا دەدەن.
