وەزیری پەروەردەی هەرێم رایدەگەیەنێت، لیستی مامۆستایانی وانەبێژ بۆ بە گرێبەستكردنیان رەوانەی بەغداد كراوە و چاوەڕوانین وەڵامەكەی بگەڕێتەوە.
ئالان حەمە سەعید، وەزیری پەروەردەی هەرێم لە لێدوانێكیدا رایگەیاند، ئەو ساڵنامەیەی خوێندن بۆ سنووری پەروەردەكانی سلێمانی، هەڵەبجە، گەرمیان و راپەڕین دانراوە درێژناكرێتەوە و وەك خۆی كاری لەسەردەكرێت، بەڵام بەرنامەیەك گەڵاڵەكراوە چەند خوێندنگەیەك لە هاویندا بۆ پاڵپشتیكردنی خوێندكاران كە پڕۆگرامیان لە دەستچووە قەرەبووبكرێنەوە بۆ مامۆستایان پابەندی نییە و لە سنووری هەر پەروەردەیەك چەند خوێندنگەیەك بكرێتەوە و ئەوەش پێویستی بە تەرخانكردنی دارایی هەیە هەر كات پڕۆژەكە تەواوكرا دەخرێتە بەردەمی حكومەت بۆ رەزامەندی دەربڕین.
وەزیری پەروەردەی هەرێم جەختیكردەوە و وتیشی، “لیستی مامۆستایانی وانەبێژ بۆ بە گرێبەستكردنیان رەوانەی بەغداد كراوە و ئێمە چاوەڕوانی وەڵامەكەی دەكەین”.
