خالید شوانی وەزیری دادی عێراق رایگەیاند، بڕیارەکەی دادگای فیدڕاڵیی عێراق لەسەر پرسی مووچە پڕۆژەیاسای بودجەی تێپەڕاند و وای کرد مووچەی فەرمانبەرانی هەرێم دابەشبکرێت و کێشەکانی نێوان هەردوو حکومەتی چارەسەرکرد.
خالید شوانی ئاماژەی بەوەکرد، بڕیارەکانی دادگای فیدڕاڵیی عێراق دەستورین و دادگاکە پشت بە دەستور دەبەستێت و ناگەڕێتەوە بۆ ئەوەی کام لایەنی سیاسی بڕیارەکەی پێ پەسەند دەبێت یاخود پێی پەسەند نابێت.
ئاماژەی بەوەشکرد، تانەدان لە بڕیارەکانی دادگای فیدڕاڵی زۆر ئاساییە و لەماوەی رابردوودا زۆرینەی بڕیارەکانی دادگای فیدڕاڵی عێراق لەلایەن هێزە سیاسییەکانی عێراقەوە تانەی لێدراوە و ئەوەش شتێکی ئاساییە.
لەبارەی بڕیارەکانی دادگای فیدڕاڵییەوە لەسەر پرسی هەڵبژاردنەکانی هەرێم، خالید شوانی ئاماژەی بەوەدا، بڕیاری دادگای فیدڕاڵی تەواو دەستورین و لەسەر ئەو بڕیارانە کۆمسیۆنی سەربەخۆی هەڵبژاردنەکانی عێراق دەستیان بە ئامادەکارییەکان بۆ هەڵبژاردنی پەرلەمانی هەرێمی کوردستان بکات.
