ئاسایشی سلێمانی، دەستگیرکردنی سێ تۆمەتبار رادەگەیەنێت کەزیانی 28 ملیۆن دیناریان بە هاوڵاتییەک گەیاندبوو.
بەڕێوەبەرایەتیی ئاسایشی پارێزگای سلێمانی لە راگەیەندراوێکدا بڵاویکردەوە، دوای بەدواداچوون و لێکۆڵینەوە بۆ سکاڵای هاوڵاتییەک سەبارەت بە سووتانی کەپرێکی فرۆشتنی سەوزە و میوەی کاسبکارێک لە شاری سلێمانی، دەستبەجێ لەسەر فەرمانی دادوەری لێکۆڵینەوە توانرا سێ تۆمەتباری رووداوەکە بدۆزرێنەوە و دەستگیربکرێن.
لە راگەیەندراوەکەدا هاتووە، لەماوەی رابردوودا ئەو سێ تۆمەتبارە دوای چوار جار دزیکردن کەپری کاسبکارێکی شاری سلێمانی دەسوتێنن بەمەبەستی ونکردنی شوێن پەنجەی تاوانەکەیان و زیانی ماددی زۆری لێدەکەوێتەوە.
ئاسایشی سلێمانی دەڵێت، لەماوەی سووتانی سێ جاری پێشوتر نزیکەی 11ملیۆن دینار زیانی دەبێ و لەسووتانی چوارەمی 17ملیۆن دینار زیانی ماددی پێدەگات بە دزینی(دۆمەڵان و هەنگوین و چەندین تۆن سەوزە و میوە)و تەواوی کەپرەکەی دەسووتێنن.
باس لەوەش دەکات، لەئێستادا تۆمەتباران بەماددەی 342 لەیاسای سزادان دەستگیرکراون و لێکۆڵینەوە لەدۆسیەکانیان بەردەوامە.
