بەڕێوەبەرایەتیی پۆلیسی راپەڕین دەستگیرکردنی باندێکی شەش کەسی دزیکردنی راگەیاند کە سەرجەمیان خزمی نزیکی یەکترن.
شۆڕش ئیسماعیل وتەبێژی پۆلیسی راپەڕین رایگەیاند، “لەلایەن هێزەکانمان لە ناو قەڵادزێ و سنووری ئیدارەی راپەڕین توانراوە باندێکی شەش کەسی دەستگیربکرێن کە خزمی نزیکی یەکترن و چەندین تاوانی دزیکردنیان ئەنجامداوە”.
ئاماژەی بەوەش کرد، “سێ لە دەستگیرکراوەکان پێکهاتبوون لە دوو ژن و کچی یەکێک لەو ژنانە، کە لە ناو قەڵادزێ زێڕ و مۆبایل و پارەیان دزیوە، دانیان بەوەدا ناوە لە شارەکانی دیکەش هەمان تاوانیان ئەنجامداوە”.
ئاشکراشیکرد، “سێ کەسەکەی دیکەشیان لە بنکەی پۆلیسی حاجیاوا دەستگیرکراون، کە دووانیان پیاون و ئەوی دیکەشیان کچە و کچی هەمان ئەو ژنەیە کە لە قەڵادزێ لەگەڵ کچێکی دیکەیدا دەستگیرکراون”.
باسیلەوەشکرد، “لە کاتی پشکنینی ماڵی تۆمەتبارەکەی حاجیاوا بڕی 44 مسقاڵ زێڕ و پێنج هەزار و 800دۆلاری ئەمریکی، وەسڵی کڕینی خانوو و زێڕ دەستیان بەسەرداگیراوە”.
بە وتەی وتەبێژی پۆلیسی راپەڕین، سەرجەم تۆمەتبارەکان بە پێی ماددەی 446 راگیراون و لێکۆڵینەوە لەگەڵیاندا بەردەوامە.
