د. بەرھەم ساڵح، سەرۆككۆماری عێراق ئەمڕۆ پێنجشەممە 7ی كانونی دووەم لە كۆشكی سەلام لە بەغداد پێشوازیكرد لە ماسیۆ تولەر، باڵیۆزی ئەمریكا لە عێراق.
لە دیدارەكەدا هەردوولا سەبارەت بە دوا گۆڕانکاری و پێشهاتەکانی عێراق و ناوچەکە و جیھان گفتوگۆیان كردووە، لەوانە پەیوەندییەکانی نێوان عێراق و ئەمریكا و پەرەپێدانی ئاسۆی هاریكارییەكان لە بوارە جیاجیاكان لە چوارچێوەی دیالۆگی ستراتیژیی نێوان هەردوو وڵات و ھێنانەدی بەرژەوەندییە هاوبەشەکان.
بە گوێرەی ڕاگەیاندراوی نووسینگەی ڕاگەیاندنی سەرۆككۆمار، لە بەشێکی دیکەی دیدارەکەدا جەختكراوەتەوە لە گرنگیی كەمكردنەوەی گرژییەكان و ڕەتكردنەوەی ناکۆکییەکان و پشتیوانیكردن لە هەوڵەكان بۆ بەهێزكردنی ئاسایش و سەقامگیری و ئاشتی لە ناوچەكەدا، هەروەها بەكارهێنانی زمانی دیالۆگ بۆ چارەسەركردنی کێشە هەڵپەسێردراوەكان و ڕێزگرتن لە سەروەری و رەتكردنەوەی دەستوەردان و دەستدرێژییەکان لە کاروباری ناوخۆیی وڵاتان.
