پەرلەمانتارێك رایدەگەیەنێت، بەربەستەکانی بەردەم چارەسەرکردنی گرفتی مووچەی هاوڵاتیانی هەرێم لابراون و بەپێویستیشی دەزانێت هەرێم درێژە بە كۆبوونەوەكانی لەگەڵ بەغداد بدات.
بڕیار رەشید، ئەندامی فراكسیۆنی یەكێتی لە ئەنجومەنی نوێنەرانی عێراق رایگەیاند، لە سەرەتای هەفتەی داهاتوو ئامادەکاری دەکرێت بۆ دابەشکردنی مووچەی مانگی سێ، دوای ئەوەی بەربەستەکانی بەردەم چارەسەرکردنی گرفتی مووچەی هاوڵاتیانی هەرێم لابراون.
ئومێدیش دەخوازێت “هیچ لایەنێکی سیاسیی عێراق و کوردستان چارەسەری کێشەی مووچەی هاوڵاتیان بە هەرەشە بۆ سەر پێگە و سەنگی خۆی نەزانێت”.
بڕیار رەشید باس لەوەدەكات كە هەوڵەکانیان بەردەوامی دەبێت و وتی، “هێشتا بابەت گەلێک هەن لە نێوان هەرێم و بەغداد کە پێویستی بە هەوڵ و کۆششی هەموو لایەکە بۆ چارەسەربوون”.
دووپاتیشیدەكاتەوە، گرنگە وەفدەكانی هەرێم لە بەغداد دانەبڕێن و “کۆبوونەوەی بەردەوام” هەبێت بۆ ئەوەی کێشەکانی نێوان بەغداد و هەرێم کەڵەکە نەبن و زوو بتوانرێت هەماهەنگی دروستبکرێت بۆ چارەسەرکردنیان.
